（原标题：历史文化+步行）

近日，广州策划历史文化步行径，包括西关寻味路、“一盅两件”美食路、专业街市井路、古广州年轮路、古水系路、珠水丝路同工业拾遗路七大主题，估计冇几耐就可以同市民见面啦。

历史文化+步行，听起来似乎唔算好新鲜，但实际上，佢系广州确立旅游发展新目标，打造世界旅游名城嘅一个标志。过去，广州作为商业特色为主嘅城市，旅游产业并无而家咁成体系，表现为：景点分散，各自为政，大量有价值嘅历史文化遗迹未被保护开发，等等。

就以古城中心北京路一带为例。过去，呢度散落住好多历史文化遗迹，比如千年古道、南越王宫、陈李济老铺、高第街许地、大小马站书院群，等等。但呢啲文物，一系就孤悬一角，各自宣传；一系就年久失修，有被破坏嘅危险。搞到好多外地朋友来玩，到头来都只系记得“去北京路买嘢”，其余就“冇乜好玩”了。

呢种局面，算唔算一座旅游城市？显然唔算啦。纵观世界著名旅游城市，如巴黎、伦敦、香港、澳门，旅游格局设计可以覆盖整整一座城，一城即一景，一城中又有唔同嘅主题街区，街区连起各个小景点，令你步行其中，几乎每一步都有嘢睇，有故事听，就如置身一个巨大嘅游乐场。

咁样，先叫作旅游城市。我哋大广州，如今拭目以待啦。

梁倩薇 编辑

(原标题：历史文化+步行)